CCCLXXV.

1491, October 29. Glatz.

Derselbe bestätigt die Schenkung eines Zinses von 7 Mark zu Dittmannsdorf an das Kloster.

Wir Heinrich der elter von gotes gnaden herczog zw Monsterperg und grave zw Glatz etc. bekennen und thun kuntt offindlich mit desem brive vor allen und yden, dy ehn sehin und horen lesen, das vor uns erschenen ist unser lieber getrawr, der wolbenampte Wenke Heringk von Slawpen zw Gerhartsdorff gesessen, (gesunden) leibs und der vornunfft unde hat aws seinem freyn willen mit wolbedachtem, umbtwungin (muthe) sebin margk groschin Polnischer czal iarlichs czinsz, zw firczehin hellern vor eynen grosschin gerechint,, die er von Lorentz Elgener burger zw Franckenstain vor sebnitzig Hungerische guldin nach lawt der forigen, doruber awsgegangen brive zw Dietmansdorff, in unserm Franckensteinschen lande gelegin, mit schuldern, hunern unde ander zugehorunge an sich pracht hatte, zw einem unwedirrufflich selegerethe vor seynir elder seleseligkait unde umbe vorgebunge seynir unde frawe Katherine seyner elichin hawsfrawen sunde, dem wirdigen herren Jacobo apte und der gancze samlunge des closters zw Camencz ewiglich gegebin, zugeeigent, vorreicbt und in unser hende auffgelassen in mosse, wie hernach folget, also das der gemelte Wencke Heringk, frawe Katherina seyne eliche hawsfrawe, die selbe czinse zw Ditmansdorff mit allin andrn zugehorunge zu iren lebtagen habin, haldin unde der geruglich gebrawchin sullen. Sonder nach ire baider apgange sullen die selbin sebin marg iarlicher czinse zu Ditmansdorff mit schuldern, hunern unde ander zugehorunge awff den genanten herren abth, seine samlunge unde ire nachkomen des closters zw Camentcz komen, sterbin unde ane hindernisz gefallin; wurde sich aber begebin, das Heintze Domantz von Schrebisdorff, dem die obgemelten sebin marg iarlichs czinses zw Dietmansdorff vor sebintzig guldin Hungerisch zw losen stehn, ader seyn erbin solche czinse wellin ablosen, so sal der gemelte herr Jacobus abth, seine samelunge gegenwertige und zukonfftige, vor dy selbe sebintzig Hungerische guldin ander czinse czewgen unde kewffen und die selbe Wencken Heringin obgnant unde frawe Katherine, seynir elichin hawsfrawin, zu irer beyder lebtagin geruglich zugnissen eyngebin. Sonder nach irer beider abgange sollen die selbin czinse, wie oben awsgedruckt ist, auff den gedachten herren abt, (seine) semelunge, kaigenwertige und zukunfftige, des closters Camentz komen, gefallin unde fort bey en unwederrufflich yn mosse, wie sie gekawfft werdin, zw ewigen geczeyten bleybin. Die selbe sebin marg czinsz zw Dietmansdorff zw eynem selegerethe, reychunge unnd aufflossunge yn unser (gegenwart?) geschen, wir hertzug Heinrich obgemelt, stete, feste unde unwedirrufflich habin wellin unde bestetigin dy von furstlicher gutte unde gewalt yn crafft detcz privis, durch den gemelten herrn abt, seine samlunge, gegenwertige unde zukunfftige des closters Camentz, nach apgange Wenke Herings, frawe Katherina seynir elichin hawsfrawe obgedacht, zu habin, zw haldin, zugenissen, zugebrauchin und domith zuthun und zulassen; dach unsern dinsten unde herlichait, auch den, dy dorzu recht habin, an dem wedireynkewffen und losunge, allerwege unschedlich. Czu urkunt habin wir desen brieff mit unserm furstlichin anhangenden ingesegil besegilt lassen werdin. Geschan auff Glatz am sonnobinde nach Symonis und Jude der heyligen zwelffboten feyer nach Cristi geburt tawsant fier hundert unde ym eyn und newnczigisten iare. Dobey sint gewesen die wolbenampten Hanns Panewicz von Rengersdorff hewptman, Clemens von Jackschonow unser kentzler und Bernhard Zelensky unser kamerer; Caspar Francko von der Freinstad unserm kentzelschreybir ward deser brieff befolhin.

Or. Perg. An Pergamentstreifen das etwas verletzte S. des Herzogs.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.